SLF KHABAR
ब्रेनहेमरेजका कारण चितवनस्थित भरतपुर अस्पतालमा उपचाररत अग्रज पत्रकार फैजुल्लाह आलमको कमजोर आर्थिक अवस्थालाई मध्यनजर गर्दै नेपाल पत्रकार महासंघ बारा शाखाले आर्थिक सहयोग प्रदान गरेको छ।
उपचारमा केही राहत पुर्याउने उद्देश्यले महासंघ बाराको तर्फबाट रु २० हजारको चेक आलमकी श्रीमतीलाई बारा जिल्लाको परवानीपुरस्थित निवासमै पुगेर हस्तान्तरण गरिएको हो।
चेक हस्तान्तरण कार्यक्रम महासंघ बारा शाखाका अध्यक्ष रमेश सुवेदी र कोषाध्यक्ष रञ्जन यादवले संयुक्त रूपमा सम्पन्न गर्नुभयो। यस अवसरमा कोषाध्यक्ष यादवले पत्रकार आलमले पत्रकारिता क्षेत्रमा पुर्याउँदै आएको योगदानको कदर गर्दै कठिन घडीमा साथ दिनु महासंघको दायित्व भएको बताउनुभयो। उहाँले यस्तो अवस्थामा सबैले आ–आफ्नो स्थानबाट सहयोग गर्नुपर्नेमा जोड दिनुभयो।
त्यसैगरी, महासंघ बारा शाखाका अध्यक्ष सुवेदीले पत्रकार आलमको शीघ्र स्वास्थ्य लाभको कामना गर्दै आगामी दिनमा पनि यस्ता मानवीय तथा सामाजिक कार्यलाई निरन्तरता दिने प्रतिबद्धता व्यक्त गर्नुभयो।
