वडा अध्यक्ष सुल्तान अंसारीका अनुसार वडा कार्यालय भवनको करिब ७० प्रतिशत काम सम्पन्न भइसकेको छ। तर, भवन प्रयोगमा ल्याउन वडा कार्यालय अगाडि रहेको एक अवैध संरचनाले मुख्य अवरोध पु¥याइरहेको छ। अध्यक्ष अंसारीले भने, “नगर प्रमुखलाई पटक–पटक मौखिक र लिखित रूपमा अनुरोध गर्दा पनि अहिलेसम्म कुनै ठोस पहल भएको छैन। वडा कार्यालय भवनको सम्पूर्ण काम सम्पन्न गरेर सेवा सुचारु गर्न नगरपालिकाको सहयोग आवश्यक छ, तर हामीले अपेक्षा गरेजस्तो साथ पाएका छैनौं।”

वडा कार्यालय भवन समयमै प्रयोगमा ल्याउन नसक्दा सेवाग्राहीहरू समस्यामा परेका छन्। विद्यालयको कक्षा कोठाबाट सञ्चालन भइरहेको सेवा केन्द्रित, सहज र व्यवस्थित हुन सकिरहेको छैन। एउटै कोठाबाट कार्यालय सञ्चालन गर्दा न फाइल व्यवस्थापन सहज छ, न सेवाग्राहीलाई जानकारी वा गोपनीयता प्रदान गर्न सकिने अवस्था छ। वडा सदस्य खलिल देवान भन्छन्, “वडा कार्यालय भनेको स्थानीय सरकारको पहिलो तह हो। यहीँबाट नागरिकलाई दैनिक रूपमा सेवा दिइन्छ। तर अहिलेको अवस्थाले गर्दा न हामीलाई काम गर्न सजिलो छ, न जनताले सेवा लिन।”