उपमहानगरपालिकाका अनुसार निर्माण कार्यमा देखिएको ढिलासुस्ती र लापरवाहीका कारण विकास योजनाहरूमा नकारात्मक प्रभाव परेको छ। समयमै काम सुरु नगर्ने कम्पनीहरूमाथि अब सार्वजनिक खरीद ऐन र नियमावलीअनुसार कारबाही गरिने चेतावनी पूर्वाधार विकास महाशाखाका प्रमुख इन्जिनियर अभयकान्त झाले दिएका छन्।

हाल वडा नं. १९ मा वडा कार्यालय भवन, वडा नं. १६ सखुवाघाटमा विद्यालय भवन (ट्रस निर्माण) र वडा नं. ४ मा सामुदायिक भवन अगाडिको कल्भर्ट तथा बाटो निर्माणका काम ढिलो भइरहेको उपमहानगरपालिकाले जनाएको छ। यी योजनाहरूमा क्रमशः साम्राट निर्माण सेवा (बारा) र एस एण्ड बी कन्स्ट्रक्सन (पर्सा) ले ठेक्का पाएका छन्।

नगर प्रमुख राजन पौडेलले विकास निर्माणमा पारदर्शिता, समयपालना र गुणस्तरीयता सुनिश्चित गर्न सबै ठेकेदार कम्पनीहरूलाई जिम्मेवारीपूर्वक काम गर्न आग्रह गरेका छन्। साथै, भविष्यमा यस्ता लापरवाही दोहोरिन नदिन सबै सरोकारवालाको सहकार्य आवश्यक रहेको पनि उल्लेख गरेका छन्।