रोशन गुप्ता
बारा, ३१ भदौ
बारा जिल्लाको जितपुरसिमरा उपमहानगरपालिका–७ जीतपुरमा यस वर्ष श्री गणेश चतुर्थी पूजाका क्रममा भगवान गणेशलाई प्रसादका रुपमा २७१ किलोको ठूलो लड्डु चढाइने भएको छ ।
बाराको जितपुर स्थित श्री सिद्धि विनायक पूजा समितिले मंगलबार देखि सात दिने भव्य पूजा गर्ने भएको छ । महोत्सवको पहिलो दिन जितपुरसिमरा उपमहानगरपालिका वडा नं.७ मा आयोजना गरेको पत्रकार सम्मेलनपछि आयोजकले गौशाला–७ को मैदानमा भव्य शोभायात्रा निकाल्ने कार्यक्रम तय गरेको छ ।
आयोजक समितिका अध्यक्ष श्रीराम साह कानुले घोषणा गरे अनुसार आगामी श्री गणेश चतुर्थी उत्सवमा एक महोत्सव, एक मेला, एक खेलकुद उत्सव, रोटे पिङ र परम्परागत पूजा समावेश हुनेछ। धार्मिक परम्पराअनुसार भगवान गणेशलाई चढाइने पूज्य लड्डु महाप्रसादको आकार वृद्धि गरिएको आयोजक समितिका अध्यक्ष ले जानकारी दिए । पत्रकार सम्मेलनमा उनले यस वर्षको पूजामा २सय ७१ किलोको एउटा लड्डु राखिने जानकारी दिए, जुन अघिल्लो चाडको लड्डुभन्दा १० किलो लड्डुभन्दा बढी हो ।
भगवान ् गणेशको साँझको पूजा, भजन कीर्तन सहित दैनिक ५० किलो लड्डु वितरण गर्ने आयोजकले घोषणा गरेको छ । संस्थाका कोषाध्यक्ष मनोहर सोनीले हालसम्म रु दुई लाख मात्र प्राप्त भएकाले गणेशको पूजाका लागि आर्थिक सहयोग गरिदिन आग्रह गर्दै स्थानीय समुदायलाई अपिल गरेका छन ।
पत्रकार सम्मेलनमा वडा नं ७ का वडाध्यक्ष सुनिलकुमार गुप्ताले भगवान गणेश पूजाका लागि व्यक्तिगत र वडाको तर्फबाट सक्दो सहयोग गर्ने प्रतिबद्धता व्यक्त गर्नुभयो । जीतपुरमा विगत ११ वर्षदेखि भगवान गणेशको पूजा गर्ने परम्परा रहिआएको आयोजकले जनाएको छ ।
हरेक वर्ष झै भगवान श्री गणेशको शोभायात्रा फेरि यस पटक हाती र घोडा सहित नगर परिक्रमा गरिने आयोजकले पत्रकार सम्मेलन मा जनाएका छन । पत्रकार सम्मेलनमा वडा नं ७ का वडाध्यक्ष सुनिलकुमार गुप्ता, पूर्ववडाध्यक्ष रामबाबु गुप्ता, नगर उद्योग वाणिज्य सङ्घका वरिष्ठ उपाध्यक्ष मनोज कुमार गुप्ता, नेता आफताब आलम, सञ्चारकर्मीलगायतको उपस्थिति रहेको थियो ।
