रोशन गुप्ता
बारा, ११ बैशाख
मधेशमा धेरैले दाइजो प्रथाको विरोधमा आवाज उठाइरहेका छन, तर वास्तवमा थोरैले मात्र ती शब्दहरु व्यहारमा उतारेका छन । यसै सन्दर्भमा युवा पत्रकार रोशन गुप्ताले दाइजोमा एक रुपैयाँ पनि नलिई विवाह गरेर उल्लेखनीय उदाहरण प्रस्तुत गरेका छन ।
गुप्ता हाल एल.एल.बी (LL.B) को दोस्रो वर्षमा अध्यनरत रहेका छन । अधिवक्ता बनेपछि गरिब जनताको अवाज बन्ने तथा न्यायको लडाइमा जनताहरु सँग एक रुपैया पनि नलिने वहाँले बताएका छन ।
बाराको जितपुरसिमरा उपमहानगरपालिका –७ , जीतपुर निवासी पत्रकार रोशन गुप्ता र सर्लाहीको सुखचैना गाउँपालिका वडा–१ निवासी दिपनारायण साहकी जेठी छोरी निशा साहबिच दाइजो रहित विवाह सम्पन्न भएको हो ।
मधेश प्रदेशको बारा जिल्लाको बारागढी गाउँपालिकाका अध्यक्ष अशोक जैसवाल र प्रसौनी गाउँ पालिकाका अध्यक्ष बिनोद जयसवालले नव बिवाहित जोडीको घरमै पुगेर सम्मानपत्र सहित सम्मानित गर्नुभएको छ ।
मधेशमा दाइजो प्रथा अन्त्यको बारेमा सामाजिक संजाल र सार्वजनिक भाषणमा मात्र सिमित देखिन्छ । वास्तवमा, थुप्रै शिक्षित र जागिरे युवाहरुले ठुलठुला दाइजो स्वीकारेर यो हानिकारक परम्परालाई बढावा दिइरहेका छन ।
पत्रकार रोशन गुप्ता मधेश प्रदेशको चर्चित पत्रिका मधेश संचार राष्ट्रिय दैनिक पत्रिकाका सम्पादक तथा निर्देशक हुन । सामाजिक मुद्दाहरूमा निर्भीक रिपोर्टिङका लागि परिचित गुप्ताले आफ्नै कार्यहरूमार्फत समाज सुधारका लागि आफ्नो प्रतिबद्धता व्यक्त गरेका छन ।
पत्रकार रोशन गुप्ता र निशा गुप्ताले दाइजोमुक्त विवाह गरेर समाजमा उल्लेखनीय उदाहरण प्रस्तुत गरेकोमा हार्दिक बधाई ।
