धान दिवसको अवसरमा आयोजित कार्यक्रमको प्रमुख आकर्षण भनेकै अध्यक्ष र उपाध्यक्ष स्वयं किसानहरूको पहिरनमा खेतमा उत्रेर रोपाइँमा संलग्न हुनु थियो । उनीहरू गाउँपालिकाका कर्मचारी टोली, कृषि शाखा प्रमुख, वडाध्यक्षहरू, महिला स्वयंसेविका तथा कृषकहरूको साथमा खेतमै उत्रेर धान रोप्दै कृषकको सम्मान र खेतको माटोप्रतिको लगावको सन्देश दिएका थिए।
कार्यक्रममा बोल्दै गाउँपालिका अध्यक्ष रामक्षत्री कुर्मीले भने, “कृषक राष्ट्रका मेरुदण्ड हुन । खाद्य सुरक्षाका लागि धान उत्पादन बढाउन हामी सबैले सामूहिक प्रयास गर्नुपर्छ । गाउँपालिकाले कृषिमा यान्त्रिकीकरण, सिचाइ सुविधा र मल–बीउको समयमै आपूर्ति गर्न प्राथमिकता दिइरहेको छ ।” उनले किसानप्रति आभार प्रकट गर्दै, कृषिलाई आत्मनिर्भरता र रोजगारीको मूल स्रोत बनाउन आवश्यक नीति निर्माण र बजेट विनियोजन गरिएको जानकारी दिए ।
त्यसैगरी उपाध्यक्ष सुगान्धी देवी कनुइनले धान दिवसको महत्वमाथि चर्चा गर्दै भनिन, “धान हाम्रो जीवन, संस्कार र संस्कृतिसँग जोडिएको अन्न हो । किसानहरूको मेहनत र परिश्रमले नै हामीलाई आत्मनिर्भरता तर्फ डोर्याउनेछ । गाउँपालिकाले किसानको सीप अभिवृद्धि र उत्पादनमा प्रविधिको पहुँच विस्तारमा प्रतिबद्धता जनाएको छ ।”
कार्यक्रममा विभिन्न वडाबाट सहभागी भएका कृषक समूह, महिला कृषक तथा कृषि प्राविधिकहरूबीच अनुभव आदानप्रदानसमेत गरिएको थियो । कृषकहरूलाई उन्नत बीउबिजन, जैविक मल, र विभिन्न कृषि उपकरणहरूबारे जानकारी दिन कृषि प्रदर्शनीसमेत राखिएको थियो ।
धान रोपाइँसँगै स्थानीय बालबालिकाले कृषि सम्बन्धी गीत तथा नाच प्रस्तुत गरे भने महिला समूहहरूले परम्परागत ढंगले स्वागत तथा खाना पकाउने प्रदर्शनीसमेत गरे, जसले कार्यक्रममा थप आकर्षण थप्यो ।
परवानीपुर गाउँपालिकाले आगामी वर्षहरूमा धान दिवसलाई अझ वैज्ञानिक, साङ्घिक र ज्ञानमूलक ढंगले विस्तार गर्दै कृषकहरूको हकहितको संरक्षणमा क्रियाशील रहने प्रतिबद्धता जनाएको छ ।
